Beberapa Contoh Pantun Mandar

Mauma dilalang ku'bur
nasamboi cakko-cakko
membue toa
mua kandi'u landur


Tenna rapanda uwwai
mala lolong lomeang
mettonang banda
di naunna ende'mu


Tenna rapanda marepe
bisa' tongamma naung
namuitai
ateu dilalang monge


dotama dai di bulan
mane ummondong le'mai
dari na dzini
mate tammebaine




 

 

PUISI MANDAR “RUPPU’ LOPI”

“RUPPU’ LOPI”

Ditangngana lembong rappa’
Ditippallesunna arus majirris
Dale’ba me’illong
Eee.eee

Papiai pangolo
Me’ itai dai’
Tai angin silumba
Mapattang kapa’-kapa’
Me’ itai sau

Bara’ kaleleang domai
Me’ ita’ tama
Bayasa nasang dona batto
Mendonga dai’
Siamme arrappuang mata allo
Menggilinga dikanang dikaeri
Alangan mengirringi

Apa digau….?
Ana’ kodza salindoanggi
Jurumudi matindo todzi
Lailaha illallah muhammadarrasulullah

e….e….e…
sore lopi ruppu lopi
sisara’ sara’mi sawi
apa lari malammusa’ natuyu

PUISI MANDAR “POROAMA”

“POROAMA”

Mua’ uingarammi

Di uru mubalerrina kindo’u

Mapia pia kedzo pao

Mapia pale’o mittambeng patappulo

Sangnging pecawa dirupammu

Apa uwa, Mupaiyyoang

Apa upemelo muturu’i

Sangga iya anna oho muissang

C e e e e h

I’o dza’ a

Maran-marannupa’

Binamalammu sibali parri’ indo’u

Dite’e

Mangapa damo’o

Tarruwa mo’o mittambeng

Sisapa tomo’o mecawa

Ta’  iya ta’ oho’ tomo’o

Occommi turu’

Tannipa’uwammo sibali parri

Iyyae….

Naluppeimi janjinna

Natolumbua’ sola kindo’u

Talla’mi indo’u

Ma’ dai mutalla

Santundamo, iyo u..u,,

PUISI MANDAR “ODI ADA’ ODI BIASA”

“ODI ADA’ ODI BIASA”

Sendana simemangan

Nibala Tanniaatonang

Naratang dipitu ulunna salu’

Sitinaya dipitu ba’bana binaga

e….e….e…e…

maliluo, maliluo, maliluo

panette’o dipetawung tarra’ba

maroro titting Tandi bassi’

atutui akke lette’mu

penggilinga’ dipondo’mu

pa’iyai to iya

pataniai to Tania

odi ada’ odi biasa

pettunga’eno’o mappikkirri

pendongao pattimbangngi

alai lao tongang

passippatui pau anna kedzo

Musamba lino mulete

Tarra’da’I bulu sallambarmo

Maudzi simbi’ mamma’dai tipasender

PUISI MANDAR “ITOTALLELE”

“ITOTALLELE”

Naposoe soena

Naposeppa’ seppa’na

Napokedzo kedzona

Itararrare diallo

Tammatindo dibongi

Mappikkirri rannuanna tomaranni

Iyamo digallar, iyamo disanga

Pappang tarra’bana Pambussuang

Ayu tassape’na Balanipa

Tuppuang bassinna To Mandar

Rambang tambottuna Sulawesi

Sapparaya tarrarana Indonesia

Mua’ purami napau

Purami napalandang

Napemaliangi nali’ai

Mau natissolor doe

Sisulli mata gayang

Nasiapi bulang anna lita’

Tisembe kondo bulo

Dotai silakka ulu anna salakkana

Dadzi namarrusa allewuang

Mau nalimbang nyawa

Tale’ namala pura loa

Disesena atongangang

Namappatumballe lita’ pembolongan

                                                By : Ahmad Asdy

PUISI MANDAR “ BAMBA MANURUNG”

“ BAMBA MANURUNG”

Tallemi bamba manurung

Bamba simemanganna lita’

Rondong dilangi’

Manete di tarauwe’

Hauwa bambanna

Buaimi la’lang bubur

Tokkoni sallu-sallu

Bullemi bandangan

Petaengmi pasa’tippo

Ribami pamenangan

Anna mupapiai pe’olomu

Mangada’ diindo amanna lita’

Tamba’barmi burana mera’

Mapiami tisamba’na lembang

Mappadendammi palugang

Situntang patulaq tomi

Pettittiroko’na manu’

Ma’batammi sumanga’na banua

Lewami lino

Tumballe’mi lita’

Polemi  sara mannussa

Mallaherangmi gau’ tongang

Membolong di bamba manurung

Sangga’di mesa

Me’illongngi ma’ batang langi’

Sumanga’na lita’ dimandar

Sallemi aratangmu

Barumi passollormu

Apa’ idomi siareteang

Indo amanna lita’